l castielho dua hourtica, ou un zgrilar de cebolhas a ansaiar sou bolo de paixarinas berdes // o castelo de uma hortinha, ou um grelar de cebolas a ensaiar o seu voo de borboletas verdes

"Os desastres da guerra" - II
Quadros dua sposiçon de Graça Morais // Quadros de uma exposição de Graça Morais

[Fundação Arpad Szenes - Vieira da Silva]

nun te anganhes, que l Mal nun ye bezino a bibir paredes meias cuntigo: el bibe andrento de ti i cada die apenas chega pa l manteneres an sou sítio, lhuita que te ampeça andrento i nunca s'acaba: nun lo deixes ganhar te esta guerra;

abraça te la muorte cun sou bózio friu, i atácan te las quelores cumo balas que todo l quadro pingorotórun cun sou sangre, deilha se lhebanta un malo oulor que te pon boubo i ua fame que nada ye capaç de fartar;

se passares a reixiç l suolo de l mundo, berás que todo acúbren sues feridas, que sous riscos todo prénden, i parece nada quedar yá adonde bibir puodas: mas mira la hourtica berde, an tou castielho oupida, adonde tenes por rodriga ua soledade sien fin; mira l zgrilar de las cebolhas a ansaiar sou bolo de paixarinas de alas berdes, anquanto se muorren;

al fondo i siempre, sigue la percion an busca de pan i dua risa que puoda amparar ls dies: quei achas pouco amporta, mas nunca tue caminada ha de acabar, que outro modo nun tenes de te achar, de quedar bibo contra la cadena i l beneno de todos ls miedos;
la Pintora mirou l mundo an sous sufridos uolhos i botou las lhágrimas a boziar an quelores bibas: agora naide las calha.

//

não te enganes, que o Mal não é vizinho a viver paredes meias contigo: ele vive dentro de ti e cada dia quase não chega para o manteres no seu lugar, luta que te começa dentro e nunca acaba: não o deixes ganhar-te esta guerra;

abraça-te a morte com o seu grito frio, e atacam-te as cores como balas que todo o quadro pingaram com o seu sangre, dela se levanta un cheiro mau que te enlouquece e uma fome que nada é capaz de saciar;

se passares ao RX o chão do mundo, verás que tudo cobrem as suas feridas, que os seus riscos tudo prendem, e parece nada ficar já onde viver possas: mas olha a hortinha verde, como teu castelo erguida, onde tens como cajado uma solidão sem fim; olha o grelar das cebolas a ensaiar o seu voo de borboletas de asas verdes, enquanto morrem;

ao fundo e sempre, continua a procissão em busca de pão e de um sorriso que possa amparar os dias: o que encontras pouco importa, mas nunca a tua caminhada ha de acabar, que outra maneira não tens de te encontrar, de permanecer vivo contra a cadeia e o veneno de todos os medos;
a Pintora olhou o mundo em seus sofridos olhos e pôs as lágrimas a gritar em cores vivas: agora ninguém as cala.