ampeça siempre steporado abril
cun sues mintiras i augas mil
nun fúran ls páixaros cun sues cantigas
i las flores cun sues quelores
daba mesmo jeito que dius eisistira
mas agora yá nun adelantra
que nun falta cun que mos antretenermos
hai pessonas que todo fázen por
quedar carecas solo para nun tenéren
pelos rúcios i you que nunca me passou
ua eideia dessas pula cabeça
salo pulas rues que me dá l suonho
antes de acabar la purmeira fuolha
de la Guerra de l Peloponeso de Tucídides
atrabéssan çarumbatas las pessonas
ua manhana inda dóndia cula auga de la nuite
i bózian amboras jornales colgados nun
casulho adonde ls cigarros inda nun stan
fechados a cadenado i l purmeiro beiso
de l die aguanta la squina de la rue
i abana l berde solo para amostrar que hai aire
deixa te ir pul carreiron de l oulor a café
que inda un cacho de la nuite arrastras
déixan te boubo las lhuzes de l tránsito
a acender i apagar i a pedir mais cuidado
ne ls atrabessadeiros nada al modo para
quien bai sien çtino i pouca gana
de spertar l'andrumenhada cuncéncia
naide me spera nien quier saber
de la gorra basca que lhiebo na cabeça
nun hai roupa an stendideiros nesta parte
de la cidade i solo me queda l bruído
de ls altemobles i las bocas de l metro
para mirar i scapar al oulor a doces que ben
de las pastelaries i me pon agoniado
nun chegueste a abrir la caixa de la tristeza
nien a lhembrar te de nada que steia loinje
quedeste eilhi nun scanho de la rue
a mirar palombas i pardales sien
que ua eideia te anubrinasse ls uolhos
quedeste eilhi sien mais que te chamara
i era manhana alta quando ua risa te spertou
nun son ls passeios de la purmanhana
tan dados a mirares metafísicos
que inda ls sotos chéiran a xabon
cun que le lhabórun las cotras de la nuite
habie de bolber a casa mas yá sfriou la cama
i als sábados nun ye die d'almuorço
assi me quedo abierto al abraço de la cidade
Sem comentários:
Enviar um comentário