quinta-feira, 4 de agosto de 2011

munha (1)


munha: palhicas trilhadas, tan pequeinhas que mal se béien i son capazes de antrar an qualquiera buraco; pesadelo de meter palha an palheiro; todo aqueilho a que, a la purmeira, nun le damos amportança i cometemos l erro grabe de l çpreziar.
percípios de munha ou de las cousas mínimas:
1) las mínimas cousas eisísten: nun se dá por eilhas por falta de grandura, por fastiu ou por questume;
2) hai cousas mínimas que recénden a einutelidade: son las melhores;
3) ye culas cousas mínimas que se dá la streformaçon de quantidade an culidade [anque nun conste que Marx ou Hegel algue beç téngan metido palha i respirado munha];
4) çpreziar las cousas mínimas ye ir fazendo buraquitos ambisibles por adonde se bai [al modo de auga an barrila] la bida;
5) l prazer ou l sou cuntrairo questuma benir nas alas de la munha i outras menudas mínimas;
6) çtinguir las cousas mínimas ye un eisercício filosófico de alta cuncretizaçon, puis pássan i nun mos damos de cuonta;
7) la frol de las cousas mínimas chama-se houmildade: dessa eisséncia partecipamos;
8) para saber de las cousas mínimas hai que spertar la parte de boubo que hai an nós: puode ser de nino;
9) çcubrir ua cousa mínima por die puodse ser ampossible: son de mais, mas nun se dá lhougo cun eilhas;
10) tratar de cousas mínimas ye la mais mínima de todas.




1 comentário:

Marcolino e Mara Cepeda disse...

Amadeu,

As coisas mais mínimas são as mais difíceis de visualizar. Perdemos o olhar da inocência que nos proporcionava a capacidade de poder ver o que ninguém mais conseguia.
Fazíamos descobertas extraordinárias e únicas.
Quem me dera reconquistar essa capacidade de ver para além do visível.
Mantenha essa rara visão.