Çpedida

Bai-te anho, que yá nun tornas
a tener outr'anho tou:
mas bibirás porque bibo;
quien bai morrendo sou you

al modo que ls anhos pássan
cua mui grande admirança:
al modo que quedo bielho
un tiempo nuobo m'alcança

i me fasta de ls antigos;
nun te pago l que me deste,
puis nunca saberie cumo,
mas ne l que an mi te quedeste

spero fazer buona paga:
todos te mándan ambora,
mas you, nun sei bien porquei,
tengo algo andrento que chora.

Ye l tiempo que sembra an nós
angúrrias i remissacos,
delores, miedos, i suonhos,
pelo rúcio, i chenos sacos

de lhembráncias, squecimientos;
de todo quédan-mos nadas
an que mos bamos çfazendo
al son de las airaçadas.

Cumo pesa l nunca mais,
esso si, ye la mie muorte,
que an mi se bai antranhando
(bibir tamien ye ua suorte)!

Fonso Roixo

Maluquice

A la lhéngua mirandesa



Nun te conhece naide. Nó. Assi i todo you canto-te.

Frederico García Llorca [Llanto por Ignacio Sánchez Mejías, IV]
Traduçon Fracisco Niebro



[an castelhano

No te conoce nadie. No. Pero yo te canto ]

Anho bielho V

Solo hai ua corona de glória de que podemos tener proua: ye l bien que sembremos [tenga esse bien la forma que tubir i seia a respeito de l que fur]. Agora, hai que asperar que la sementeira naça, mas sien nunca deixar cansar l braço sumbrador. Anque todo esso mal se beia, stá ende la raíç de la paç a que tenemos dreito, la paç mais neçaira i que solo depende de nós, la paç cun nós mesmos.

Anho bielho IV

Hai anhos de que, an ciertos sentidos cumo salude, poderiemos dezir que fúrun annus horribilis.
Serie grande la tentacion a dezir que este fui un deilhes. Mas porque lo habie de dezir se outros piores inda puoden benir?

La bida nun ye cumo ls poços: ye siempre possible bater mais fondo.

Anho bielho III

L mirandés cuntina sien ua anstituiçon central, pública, que ajunte todos ls sfuorços que se fázen, que l repersente i que l lhiebe mais para lantre.

Para alhá de l Menistério de la Cultura [an que la Menistra yá l pormetiu bárias bezes] ls repunsabbles son muitos. Por mi digo cumo yá dixo l Abade Manuol Sardina an 1884 a respeito de andifréncia de las Academies delantre de l mirandés: «bergonha aterna a todos eilhes».

L mais de ls mirandeses sei que bamos a cuntinar a fazer l que ye nuossa oubrigaçon an relaçon a la nuossa lhéngua: falá-la, screbi-la, dibulgá-la, degnificá-la als uolhos de l mundo, studá-la i lhebá-la palantre.

Anho bielho II

Este fui un anho special pa ls caminos de la lhéngua mirandesa pula anternete. Yá muitá que eilha anda porqui, mas astanho stendiu-se a la lharga. Agora hai que la lhebar mais loinge i a todo l lhado, aprobeitando las bantaiges de la publicaçon ne l sfergante i para todo l mundo.

L que falta agora ye que la lhéngua mirandesa fale cada beç mais de todo i aparéçan blogues temáticos subre ls mais bariados assuntos. Tamien ténen que aparecer sítios adonde toda essa anformacion seia cunsolidada i guárden todo l que ten de ser guardado para alhá la nubrina de cada die, yá que ls sítios eisistentes ou son mui amadores ou nun cunsíguen subertir l campanairo de cada terrica.

Ampeça a ser tiempo de pensar an custruir un jornal birtual, todo screbido an mirandés: que anforme ne l sfergante i que pense i que ajunte giente alredror de l porjeto. Talbeç essa puoda ser ua nobidade a balanciar para deiqui a un anho.

L mirandés ancarrapitou-se na óndia de l'anternete i agora nunca mais la puode deixar, abinturando-se cada beç mais por nuobos mares. Bonda nun perder l baláncio.

Anho bielho I

La purmeira cousa a dezir ye que stamos bibos, cundiçon para poder mirar al para trás i andar al palantre.
Ye l purmeiro anho bielho deste blogue, anque inda nien sequiera tenga un anho.

Quando un ampeça a mirar al para trás, pa l que fui este anho, solo bei nubrina. Fui hai tan pouco tiempo i nien sequiera se me lhembra de l que staba a fazer hai un anho a esta hora ou que die de la sumana fui l 31 de dezembre. Cun tanta nubrina, nun admira que seia tan defícele fazer la stória.

Miro al para trás i beio pessonas, sítios, palabras, risas, delores, salude, malinas, cachicos buonos, cachicos menos buonos, cousas que fiç i cousas que nun fiç i gustarie de haber feito. Nun dá para fazer l baláncio: l amportante fui l que s'antranhou an mi fazendo-me ua pessona defrente, un cachico mais bielho i spero que un cachico melhor. Talbeç mais uns pelicos rúcios, uas angúrrias, uas ferruges pulas drobezes de l cuorpo.

Muitas horas de astanho stan neste blogue: horas de boziar la solidon an busca de cumpanha, cumo se fúramos an óndias pul mundo, an letras, an palabras, an testos. Acaba por nun amportar se mos léien: amporta ye star acá, ne l camino por adonde nun sabemos quien bai a passar. I ls própios testos ban quedando, ban-se ancarramelando, fazendo l sou própio camino.

Ye assi: screbir ye ua lhuita contra la muorte. Estes testos son ua proba de bida: eisísten, eisisto, stan acá, stou acá. Esso ye l ampeço de todo.

Bacas matancieiras

Ancuntrei-lo acerca de l Saldanha, uolhos de renobielha i aqueilhas certezas que todo cumplícan. Fumos praceiros de carteira, you na quarta i el na segunda classe.
Eiqui queda un cachico de la lharga cumbersa.
- Sali de l'aldé hai quarenta anhos i inda ye assi que la beio. Yá tornei alhá neste antretiempo, mas eilha nun demuda.
- Sabes l que me lhémbran las Scapadas?
- L quei?
- L Folharanço. I sabes l que me lhembra l folharanço?
- L quei?
- Las bacas chouriceiras. Apuis dua bida de trabalho, secas, yá solo músquelo, yá nun serbien para mais nada que chouriças.
- Nó, dixe-le, las bacas matancieiras, cumo le chamában, éran matadas ne ls currales. Agora las bacas de bender al quilo, essas si éran presas ne l Sagrado, cun un sobeio al Folharanço ou a la puorta de l açougue. Era pa las pessonas sabéren que iba a haber chica l die apuis. Las bacas matancieiras éran partidas, cumo tal, an quatro i apuis metien la chicha nuns cestos sterqueiros, cun un albeiro ambaixo para que la chicha nun se amporcasse.
Pisca mais ua beç l relhumbrar de ls uolhos, spiertos cumo dues streilhas. Deseamos-mos bun anho.
Beio-lo a fastar-se, l gorro anterrado até als oclos, l sobretudo çpindurado de ls ombros, yá a dar a dar a fogaça. Quien l bei, inda cuida que camina neste mundo...

Ambasones bárbelas

Datrás, hai dous mil anhos, quando uns pobos tenien fame, ajuntában-se a la raia de outros pobos mais ricos, i oubrigában ls generales a ser heirois para ls detenéren. Al modo que íban daprendendo, ganhában fuorça i antrában puli al para lantre: chamában-le a esso las ambasones... bárbelas. Bendo bien, uns scapában de la fame, outros de l friu, i outros buscában sabe-se alhá l quei.

Quando you era moço, la giente que tenie fame passaba las raias de ls mais ricos, iba por essa ouropa afuora i pul mundo, i estes podien aporbeitar l trabalho deilhes. Inda ls cunsidrában bárbelos, mas nun era de ambasones que se trataba, anquanto deilhes percisórun. Siempre le oubi dezir a essa giente: quien ten fame busca-lo adonde lo haba.

Agora bénen de África an cousas a mo de barcos i achégan-se a la raia de mar de ls mais ricos, cumo nuoba demanada de l santo graal: nien chégan a dar trabalho a generales i eisércitos, que lhougo son recambiados pa l sítio de adonde benírun. Mas méten-le miedo, bien se bei, a quien perdiu la lhembráncia de l que fui i para adonde fui.

Las ambasones bárbelas studei-las al sbarrulhar de l ampério romano. Agora, leio ls jornales i dízen-me que bénen ende ls bárbelos i hai que le cerrar la puorta. Lhembra-se-me bien que l grande ampério romano, inda que cientos de anhos apuis, nun le rejistiu. Nunca naide aguantou las ambasones... bárbelas. Quien ten fame nun puode deixar de lo buscar adonde lo haba, anquanto tubir fame.

Fracisco Niebro

La raíç

L que de la tierra nace i cula fuorça de la tierra creciu comemos: obra an nós i a la tierra buolbe, mas de l que an nós queda mos fazemos; nun somos quelor d'arble ou fuolha, mas de tierra amarielha, negra, clara, mos queloramos; ye la Tierra l nuosso mundo, que pisamos i de adonde nun salimos: anton, porquei queremos tanto bolar se la bida, l sangre, mos ben dua raíç? haberá outros mundos, outras bidas, mas ye la Tierra que mos assopra la bida: ser eicologista ye gustarmos de nós, de la madre que mos girou i mos manten: se nun fur esse gustar, mais bal todo mundo poner a bolar.

Fracisco Niebro

Odas de Ricardo Reis (034)

Nó a ti, Cristo, ódio ou çprézio
Que als outros diuses que antes antrórun
Na mimória de ls homes
Nien mais nien menos sós, mas outro dius.

Ne l Panteon faltabas. Yá que beniste
Ne l Panteon tou lhugar acupa,
Mas cuidas nun atentes
Lhadronar l que als outros ye debido.

Tou búltio triste i quemobido anriba
L machorro delor de l’houmanidade antiga
Si, nuoba guapa quelor
Trouxo al antigo Panteon ancierto.

Mas que ls tous crentes nun úpan anriba
Outros, antigos diuses que datórun
Por filhos de Saturno
De mais acerca l’ourige armana de las cousas,

I melhores lhembráncias arrecolhírun
De l caos de l ampeço i de la Noite
Adonde ls diuses nun son
Mais que las streilhas criadas de l Fado.

Nó a ti, mas als tous, tengo rábia, Cristo.
Tu nun sós mais que un dius a mais ne l aterno
Panteon que manda
Na nuossa bida ancierta.

Nien mais grande nien mais pequeinho que ls nuobos diuses,
Tue selumbrie forma delorida
Trouxo algo que faltaba
Al númaro de ls diuses.

Por esso reina a la par doutros de l Oulimpo,
Ou pula triste tierra se quejires
Bai a anxugar l choro
De ls houmanos que súfren.

Mas nun béngan malucos tous cultores
An tou nome a bedar l eiterno culto
De las perséncias mais grandes
Ou praceiras de la tue.

A esses, si, de l fondo tengo rábia
De l crente peito, i a esses you nun sigo,
Superticiosos lheigos
Na céncia de ls diuses.

Á, oumentai, nun cumbatendo nunca.
Anriquecei l Oulimpo, als diuses dando
Cada beç mais grande fuorça
Pul númaro mais grande.

Bonda ls males que l Fado las Parcas fizo
Por sou tino natural fazéren.
Nós homes mos fágamos
Ounidos puls diuses.

Fernando Pessoa [Odes, Ricardo Reis]
Traduçon de Fracisco Niebro

[an pertués:

Não a ti, Cristo, odeio ou menosprezo
Que aos outros deuses que te precederam
Na memória dos homens.
Nem mais nem menos és, mas outro deus.

No Panteão faltavas. Pois quie vieste
No Panteão o teu lugar ocupa,
Mas cuida não procures
Usurpar o que aos outros é devido.

Teu vulto triste e comovido sobre
A ‘stéril dor da humanidade antiga
Sim, nova pulcritude
Trouxe ao antigo Pantão incerto.

Mas que os teus crentes te não ergam sobre
Outros, antigos deuses que dataram
Por filhos de Saturno
De mais perto da origem igual das coisas,

E melhores memórias recolheram
Do primitivo caos e da Noite
Onde os deuses não são
Mais que as estrelas súbditas doFado.

Não a ti, mas aos teus, odeio, Cristo.
Tu não és mais que um deus a mais no eterno
Panteão que preside
À nossa vida incerta.

Nem maior nem menor que os novos deuses,
Tua sombria forma dolorida
Trouxe algo que faltava
Ao número dos divos.

Por isso reina a par de outros no Olimpo,
Ou pela triste terra se quiseres
Vai enxugar o pranto
Dos humanos que sofrem.

Não venham, porém, ‘stultos teus cultores
Em teu nome vedar o eterno culto
Das presenças maiores
Ou parceiras da tua.

A esses, sim, do âmago eu odeio
Do crente peito, e a esses eu não sigo,
Supersticiosos leigos
Na ciência dos deuses.

Ah, aumentai, não combatendo nunca.
Enriquecei o Olimpo, aos deuses dando
Cada vez maior força
Plo número maior.

Basta os males que o Fado as Parcas fez
Por seu intuito natural fazerem.
Nós homens nos façamos
Unidos pelos deuses.]

Salmos (011)

Salmo de Dabide,
pa l mais grande cantador

Ne l Senhor cunfio; cumo bos astrebis a dezi-le a la mie alma:
scapa-te pa ls montes cumo un páixaro?
Ls malos yá árman l arco
i pónen sues frechas na cuorda
para le atiráren a las scuras als que son retos de coraçon.
Quando ls aliçaces yá son abanados
que puode fazer l justo?

L Senhor mora an sou santo palácio,
l trono de l Senhor stá ne ls cielos;
ls uolhos del míran l mundo,
l capielho de sous uolhos ousérban ls filhos de ls homes.
L Senhor pon l justo a la proba,
mas al malo i al biolento nun ls puode ber.
Porriba ls malos fazerá chober tiçones acessos i alxofre,
i ua fuorte airaçada será l que inche l copo del.
Porque l Senhor ye justo i gusta de la justícia
i l rostro del stá cun atento al que ye reto.

Jó

Se cuidas que tue malina
arrepassa las de Jó,
abre ls uolhos i l que bés
lhougo te dirá que nó.

Fonso Roixo

Odas de Ricardo Reis (033)

Nó a ti, Cristo, ódio ou te nun quiero.
An ti cumo ne ls outros acradito diuses mais bielhos.
Solo te tengo por nien mais nien menos
Do que eilhes, mas mais nuobo solo.

Tengo-le rábia si, i a esses cun sereno çprézio,
Que te quieren porriba de ls outros tous armanos diuses.
Quiero-te adonde tu stás, nien mais alto
Nien mais baixo que eilhes, tu solo.

Dius triste, neçairto talbeç porque niun habie
Cumo tu, un a mais ne l Panteon i ne l culto,
Nada mais, nien mais alto nien mais puro
Porque para todo habie diuses, menos tu.

Cuida tu, eidólatra sclusibo de Cristo, que la bida
Ye bariada i todos ls dies son çfrentes de ls outros,
I solo sendo bariado cumo eilhes
Staremos cula berdade i solos.

Fernando Pessoa, [Odas, Ricardo Reis]
Traduçon de Fracisco Niebro

[an pertués:

Não a ti, Cristo, odeio ou te não quero.
Em ti como nos outros creio deuses mais velhos.
Só te tenho por nem mais nem menos
Do que eles, mas mais novo apenas.

Odeio-os sim, e a esses com calma aborreço,
Que te querem acima dos outros teus iguais deuses.
Quero-te onde tu ‘stás, nem mais alto
Nem mais baixo que eles, tu apenas.

Deus triste, preciso talvez porque nenhum havia
Como tu, um a mais no Panteão e no culto,
Nada mais, nem mais alto nem mais puro
Porque para tudo havia deuses, menos tu.

Cura tu, idólatra exclusivo de Cristo, que a vida
É múltipla e todos os dias são diferentes dos outros,
E só sendo múltiplos como eles
‘Staremos com a verdade e a sós.]

La panela de polbo

[Crónica publicada ne l jornal Público de 16 de Dezembre de 2007]

Yá quaije ua sumana que staba el solo na barraca, muntada an pie l eidefício de binte pisos que agora andában a fazer. De ls trés, solo el quedara: un, galhego, habie-le dado la belharaça a la última de la hora i dixo que yá nun aguantaba mais un anho sien s’ir a passar l Natal a la sue tierra; outro, algeriano, habie salido yá por ende un més sien dezir al quei i porquei, mas el siempre tubo l’eideia de que alguien de la família se le haberie muorto ou cousa aparecida. Houbo alguns de las barracas acerca que s’ajuntórun, mas el nun quijo cuontas cun naide, nien tenie gana de çúcia, que esso inda l deixaba mais triste. Habie mercado ua mano de polbo seco, yá uns dies, i ponira-lo de molho por to la semana. Scachonaba agora nua panela, cun tronchos i patatas a la par. Fura siempre esse l sou quemido na nuite de Cunselada.

A cierta altura inda pensou ir tamien a passar l Natal cula família, mas staba un tiempo steporado i mais balie guardar la biaige pa l berano. Stá bien que las suidades éran agora mais fuortes, mas un die tornarie d’afatibo i tenerie muito tiempo para passar l Natal cula família. Mais amportante que l Natal siempre fura tener cun quei mercar l polbo, cun quei aguantar la salude, cun quei amparar l’eiducaçon de ls rapazes. El alhá tenie las sues cuontas cun Dius, que iba acertando andrento del, mas nunca fura de missas i outras cousas assi de fazer de cuonta. Este yá era l quarto Natal que passaba fuora de casa, i l die a seguir cuntinaba cula mesma carambina a antranhá-se-le até la raíç de las benas. Stá bien que gustarie de ir até la fogueira que, a esta hora, habie de star a bruar ne l Sagrado; stá bien que l sonido de la gaita le chegaba yá andeble na manginançon, mas era quanto bundaba; stá bien que nun iba a jogar la partida de çueca, cul armano i ls cunhados, essa çculpa para tener siempre a la borda de l lhume l cacharro de bino morno, mas cacharro eilhi nun le faltaba i la çueca çpensába-la bien; stá bien que al die apuis de l Natal nun tenie de ir a trabalhar i scachar la carambina que se agarrara a todo l xantié, mas era para esso que el staba alhi, a miles de quilómetros de la sue tierra, staba alhi para ganhar la bida del i de ls que alhá quedórun.

Yá staba cozido l polbo, que bafeaba a la par de ls trochos i las patatas. Éran uito de la nuite quando metiu a la boca la purmeira garfiada. De tan buono, l polbo lhembraba-le un que comira uns anhos atrás i fura a mercar a la Spanha. Als poucos, fui cumo se fura comendo a la par de ls que deixara an sue casa, an Pertual, ua casa pouco defrente daqueilha barraca porbisória. Nesto, passou-le pula cabeça que l polbo que alhá comien fura mercado cul denheiro que el ambiara: al fin, todo fazie sentido i nien raça de suidade quedara. Essa eideia agarrou-se-le de tal maneira que fui l Natal del. L Natal mais cuntento que inda hoije se lhembra de haber passado an to la sue bida, un Natal passado de l lhado de quien dá, cumo siempre fura la bida del. Nun quiero tornar a passar por el, lhembra-se agora, mas hai cousas que nun cumben squecer.

Amadeu Ferreira

Camilo Pessanha

Baixa an folhaiges tienras la lhadeira:
- An berdes, froixos tons quaije drumidos,
Que sánan, frescos, mius uolhos ardidos,
An que la chama de rábia se sgueira ...

Á, ben, de branco, - d’antre la folhaige!
Ls galhos, lhebe, la tue mano aparte.
Á ben! Que mius uolhos quieren çposar-te,
Reber-te birge la serena eimaige.

De silba bouba un galho lhargo i squibo
Tan delicado te beisou nun dedo
Cua pinga quelor-de-rosa bibo!...

Lhebe la saia... Doce aire l’anlia.
Ah ben! De branco! D’antre l alboredo!
Alma de silfo, cuorpo de camélia ...

Camilo Pessanha
Traduçon de Fracisco Niebro

[an pertués:

Desce em folhedos tenros a colina:
Em glaucos, frouxos tons adormecidos,
Que saram, frescos, meus olhos ardidos,
Nos quais a chama do furor declina...

Oh vem, de branco, - do imo da folhagem!
Os ramos, leve, a tua mão aparte.
Oh vem! Meus olhos querem desposar-te,
Reflectir-te virgem a serena imagem.

De silva doida uma haste esquiva
Quão delicada te osculou num dedo
Com um aljôfar cor-de-rosa viva!...

Ligeira a saia... Doce a brisa, impele-a.
Oh vem! De branco! Do imo do arvoredo!
Alma de silfo, carne de camélia...]

Paisaige9

Fui slubiando debagarico antre cruzes i lajas cun dezires, uns guapos, outros mintirosos. Datrás, todo éran muntonicos de tierra, que se tornában a ousar na fin duns tantos anhos. Agora, todo se bolbira an guapas sepulturas. Nun antendie porquei nun gustában que la tierra se bira, se tanta giente eilhi fura anterrada. Ua tierra dun burmeilho seco, talbeç de l sangre de giente que nunca tubo dreito a foia cun nome an laja de marmle. Aqueilha tierra era l que quedou de toda la giente que mos trouxo al mundo i mos ansinou l que sabemos: nien seinhas de mie bó i to la giente que coinci, i de que inda le oubo las risas, que inda me fala cumo se stubira an pie de mi. Dius ye la lia que todo ata cul tiempo: la lia era aqueilha tierra burmeilha, sagrada, adonde ponie ls pies. Staba eilhi l que you iba a ser un die: un nada que se çfizo an tierra, ua tierra que cuntinará a ser l que siempre fui, cumo se nunca mos houbira recebido an sou seno, tierra mai, diusa que de nós se alimenta i mos debuolbe an nuobas bidas. Tierra mai, de adonde todo ben i para adonde todo bai.

Fracisco Niebro

Byblos

Fui guapa cidade antiga
i apuis un lhibro serie:
mas talbeç naide sperasse
que hoje fura lhibrarie.

Fonso Roixo

Salmos (010)

Porquei, Senhor, stás tan loinge?
Porquei te scondes ne ls tiempos de agonia?
An sou argulho, l malo persigue cun rábia l misarable;
que seia caçado nas rateiras que el armou.
L malo gloria-se de sues ambiçones,
l ganancioso diç mal i çprézia l Senhor.
L malo diç, na sua altibeç:
todo l que matina ye que nun hai Dius.
Cuida que sous caminos han de ir siempre palantre,
mas ls tous juízos stan loinge del a grande altura,
el çprézia to ls sous adbersairos.

Diç an sou coraçon: «nunca me eirei abaixo,
porque de giraçon an giraçon nunca starei an zgrácia.»
Sue boca stá chena de maldiçon, anganhos i stúcia;
ambaixo sue lhéngua hai moléstia i maldade.

Pon-se cumo rateira acerca las aldés,
ne ls scundideiros mata l einocente,
i ls uolhos del abáixan-se acontra l probe.
Scundido cumo lhion na sue madrigueira
arma rateiras para roubar al misarable
i quando l caça arrastra-lo na sue rede.
Ancuolhe-se i acoca-se,
i la camarada de ls probes cai an sues fuortes gárrias.

Diç an sou coraçon: «Dius yá se squeciu,
i tapa sue cara para nun tener ber mais.»
Lhebanta-se, Senhor Dius, upe la tue mano
i nun te squeças de ls misarables.
Porquei l ímpio çprézia a Dius,
dezindo an sou coraçon, Tu nun l castigarás?
Mas tu bien l bés, porque miras pa l trabalho i pa l anfado
para l antregar an tues manos.
L probe a ti apledia,
Tu sós l amparo de l uorfano.

Cobra l braço de ls ímpios i malinos:
busca sue maldade até que nun seias capaç de l’achar.

L Senhor ye rei eiterno para siempre:
zaparéçan ls paganos de la tierra que le pertence.
Senhor, tu oubiste ls deseios de ls houmildes,
tu cunfortarás sous coraçones i tous oubidos staran abiertos para eilhes:
pa le fazer justícia al uorfano i al aflegido,
para quie l home de la terra
nun cuntine a spalhar bioléncia.

Odas de Ricardo Reis (032)

Feliç aquel a quien la bida grata
Le cuncediu que de ls diuses se lhembrasse
I bisse cumo eilhes
Estas terrenas cousas adonde mora
Un refleco mortal de l’eimortal bida.
Feliç, que quando la hora tributária
Arrepassar sue preça de casa pa que la Parca scoche
L filo filado até la fin,
Gozar poderá l alto prémio
De arrar ne l Aberno sereno lhapo
De la cumbibença.

Mas aquel que quier Cristo anteponer
Als mais antigos Diuses que ne l Oulimpo
Seguírun a Saturno –
L sou blasfemo ser deixado
Na frie spiaçon – até que ls Diuses
De quien se squeciu deilhes se lhémbren -
Erra, selombra zanquieta, perdidamente,
Nien la biúda le pon na boca
L óbolo a Caronte agradecido,
I an riba l sou cuorpo sien foia
Nun bota tierra l biandante.

Fernando Pessoa [Odes, Ricardo Reis]
Traduçon de Fracisco Niebro

[an pertués:
Feliz aquele a quem a vida grata
Concedeu que dos deuses se lembrasse
E visse como eles
Estas terrenas coisas onde mora
Um reflexo mortal da imortal vida.
Feliz, que quando a hora tributária
Transpor seu átrio por que a Parca corte
O fio fiado até ao fim,
Gozar poderá o alto prêmio
De errar no Averno grato abrigo
Da convivência.

Mas aquele que quer Cristo antepor
Aos mais antigos Deuses que no Olimpo
Seguiram a Saturno —
O seu blasfemo ser abandonado
Na fria expiação — até que os Deuses
De quem se esqueceu deles se recordem —
Erra, sombra inquieta, incertamente,
Nem a viúva lhe põe na boca
O óbolo a Caronte grato,
E sobre o seu corpo insepulto
Não deita terra o viandante.]

Rábia eicológica

Rábia mesmo,
ye quando un nun puode fazer
nada, nien que sbraceie bien.

Nun fura rábia,
i serie muorte.

Fracisco Niebro

Salmos (009)

Salmo de Dabide,
pa l mais grande cantador, subre Muth-Labben.

Hei de lhoubar l Senhor cun todo l miu coraçon,
hei de cuntar todas las sues marabilhas.
An ti m’alegrarei i darei brincos de cuntento,
i cantarei salmos al tou nome, á Altíssemo.

Porque ls mius einemigos yá arrecúlan,
cáien-se i quédan-se muortos delantre de ti.
Porque tu defendiste l miu dreito i la demanda,
senteste-te ne l tribunal para julgar cun justícia.
Amanaceste ls paganos, deste cuonta de ls malos,
i arrinqueste l nome deilhes pula raíç, para siempre.
Á einemigo, acabórun-se las derrotas que fazes, para siempre,
que le çtruíste las cidades i la lhembráncia deilhes zapareciu.

Mas l Senhor sentará-se para siempre,
que yá purparou l sou tribunal para julgar.
El mesmo julgará l mundo cun justícia
i gobernará las naçones cun eiquidade.
L Senhor ha de ser alíbio pa l aflegido,
un grande alíbio an tiempos de agonia.
Ls que conhécen l tou nome, Senhor, cunfiaran an ti,
porque nunca zampareste que ándan a saber de ti.

Cantai salmos al Senhor, que mora an Sion,
anunciai antre ls pobos las sues áfricas.
El persígue ls que arramórun sangre, lhembra-se deilhes,
nun se squece de l choro de ls misarables.

Ten mezricórdia de mi, Senhor,
mira la miséria que ben de ls que m’apoquéntan,
tu que me lhibras de las puortas de la muorte.
Assi cuntarei tous lhoubores a las puortas de Sion,
i cuntentarei-me cun tue salbaçon.

Ls paganos afundírun na foia que fazírun,
ls pies prendírun-se-le ne l lhaço que scundírun.
L Senhor quedou coincido pul juízo que fizo,
i ls malo caiu ne ls lhaços que el mesmo armou.

Ls malos han de tornar pa l anfierno
i ls paganos que se squécen de Dius.
Porque l probe nun será squecido para siempre,
nien la sprança de ls anfelizes se perderá eiternamente.

Alhebanta-te, Senhor! Que l home nun subirta!
Que séian julgadas las naçones delantre de ti.
Faç cun que téngan grima de ti, Senhor,
i quéden a saber que nun pássan de homes.

Traduçon de Fracisco Niebro

Ls talamoucos

Siempre se falou a las claras,
mas ls que l'oubien nunca la quejírun oubir.

Un die benírun de fuora i boziórun
que era ua raposeira de lhéngua,
que até sabie melhor:
ye assi la fruita de las raposeiras,
fuora de tiempo.

Poderie dezir un dito:
ls piores xordos son ls que nun quieren oubir.

Fracisco Niebro

Calhórun-se las risadas

las manhanas mal se aguántan de pies,
arrebalando ne l çprézio de nuobas lhadeiras;
l tiempo, agarrado al caiato de las piedras,
derrite-se cua dureç de cúscaro;

ua proua antiga upe-se inda ne l silenço de las caleijas
a boziar ua madureç de s'aguantar
solica mesmo al centro de l mundo;
naciu de la raça de ls fincones que

scáchan al meio las airaçadas
mas nun rejísten al arrastrado rober de las patrielhas;
nun sfergante, todo quedou sério:

porquei se calhórun las risadas
stralhadas boubadas
i naide sabe adonde bamos a parar?

Fracisco Niebro

Fazer milagres dá muito trabalho

Passórun cientos d'anhos a fazer milagres,
i fúrun ajuntando seclos de canseiras.

Fazer milagres dá muito trabalho,
i bai-se perdendo la fé
quando ralamente dan cierto,
menos que las fuorças pa ls fazer.

Un die cansórun-se i fúrun-se
a bagamundar por tierras
culs milagres todos yá feitos
ou donde custáran menos a fazer.

Passórun cientos d'anhos, por milagre.
Nien milagres le balírun.

Fracisco Niebro

Paisaige8

Las piedras crécen por todo l lhado
i nun páran de nacer.
Doucalion bien las atirou,
mas nien el fui capaç de milagres, eiqui,
mar de piedra adonde tierra mal s'assoma.

Quei senó piedras habien de piedras dar?
Mas puls beneiros salie un anganha
fame de pan, azeite i bino:
de quei tenerien miedo las piedras,
assi scrabizadas,
feridas
na sue pedregal lhibardade?

Fracisco Niebro

Pedidos

Nunca sei porque me píden
cousas que nun puodo dar:
darie-las se you podisse,
a quien percisa, a la par.

Fonso Roixo

Anhos

Quando apagueste las belas
anriba de l bolho d'anhos,
deixeste la lhuç de ls dies
a lhuzir contra ls zanganhos.

Ls anhos que bou fazendo
son lhuzicas que colguei:
faç-me bien cad'anho ir bendo
ls cachicos que alumbrei.

Fonso Roixo

Odas de Ricardo Reis (031)

Sigue l tou çtino.
Rega tues arbles,
Ama tues rosas,
L restro ye selombra
D’arbles alhenas.

La rialidade
Siempre ye mais ou menos
De l que nós queremos.
Solo nós somos siempre
Armanos a nós própios.

Suable ye bibir solo.
Grande i nobre ye siempre
Bibir solamente.
Deixa l delor ne ls altares
Cumo pormessa als diuses.

Bei de loinge la bida.
Nunca l’anterrogues.
Eilha nada puode
Dezir-te. La repuosta
Stá para alhá de ls diuses.

Mas serenamente
Eimita l Oulimpo
Ne l tou coraçon.
Ls diuses son diuses
Porque nun se pénsan.

Fernando Pessoa [Odes, de ricardo Reis]
Traduçon de Fracisco Niebro

[an pertués:
Segue o teu destino,
Rega as tuas plantas,
Ama as tuas rosas,
O resto é sombra
De ávores alheias.

A realidade
Sempre é mais ou menos
Do que nós queremos.
Só nós somos sempre
Iguais a nós próprios.

Suave é viver só.
Grande e nobre é sempre
Viver simplesmente.
Deixa a dor nas aras
Como ex-voto aos deuses.

Vê de longe a vida.
Nunca a interrogues.
Ela nada pode
Dizer-te. A resposta
Está além dos deuses.

Mas serenamente
Imita o Olimpo
No teu coração.
Os deuses são deuses
Porque não se pensam.]

Siléncios

Boziaba, de tan fuorte,
Siléncios que anúncian nadas:
Brúan ls siléncios de muorte,
Cumo antes las truniadas.

Naide de cuonta se dou
porque nun aparecie:
- Ah, cumo nun me lhembrou...
Morriu-se! Hai muito nun l bie...

Fonso Roixo

Salmos (008)

Salmo de Dabide, pa l mais grande cantador, subre la lhira de Gat.

Á, Senhor nuosso Dius,
cumo ye grande l buosso nome an to la tierra!
Yá que poniste la majistade porriba ls cielos.
De la boca de ls garoticos, i de ls que máman,
faziste la tue fuorça, por bias de ls tous einemigos,
para fazer calhar al einemigo bingatibo.

Quando miro pa ls cielos, obra de ls tous dedos,
la lhuna i las streilhas que purpareste:
quei ye l home para te lhembrares del,
i l filho de l home para del te acupares?
i l faziste un cachico mais pequeinho que ls anjos,
mas de glória i de honra l coroneste.
Deste-le l poder subre las obras de las tues manos,
todo poniste ambaixo ls pies del.
Oubeilhas i buis i todo
i até ls animales brabos;
la abes de l cielo i ls peixes de l mar,
i todo l que passa puls caminos de ls mares.
Á Senhor, nuosso Dius,
cumo ye afamado l tou nome an to la tierra!

Traduçon de Fracisco Niebro