domingo, 5 de agosto de 2007

L lhobo i l cordeiro


Staba ua beç un lhobo a buer auga nua ribeira quando biu que, mais abaixo, staba un cordeiro a buer de l mesmo rigueiro. Mal apenas biu l cordeiro, l lhobo fui-se a tener cun el i dixo-le:
- Mas l que ben a ser esto? Antoce tenes stado a antrubiar l’auga para que you nun la puoda buer…
- Çculpai-me, respundiu-le l cordeiro, mas cumo you staba a buer de l lhado de baixo, para adonde cuorre l’auga, nun cuidei que podira antrubiar l’auga que stábades a buer…
Cumo l lhobo staba resolbido a meté-se cul cordeiro, nun se quedou, i dixo-le:
- Puode ser, mas hai por ende uns seis meses soube que deziste mal de mi, nas mies cuostas.
- Cumo puode ser esso, se hai seis meses you inda nien sequiera habie nacido!?
- Nun tenes bergonha? Cumo ye que puodes dezir ua cousa dessas? Siempre la tue família le tubo rábia a la mie i, por esso, se nun fuste tu que deziste mal de mi, há de haber sido tou pai.
I mal apenas acabou de dezir estas palabras, l lhobo saltou para anriba de l cordeiro, matou-lo i comiu-lo.

Porqui se bei que aqueilhes que nun ténen sentimientos, ralamente oubiran la rezon. Quando l poder le ye dado a la crueldade i l’anjustícia, nun adelantra argumentar cun eilhes, porque l tirano siempre achará modo de poner las culpas parriba de la sue bítima.

Hai alturas an que sós atacado i te ténen rábia i nun adelantre buscares las rezones bálidas, que nun las hai, i tenes de seguir l tou camino defendendo-te dessa giente.

(Fábula de Eisopo, amanhada i cun outra licion acrecentada)


Sem comentários: