sábado, 21 de abril de 2007

L tiempo de ls tomielhos

Tomielhos (retrato de Manuol Bandarra)


L roixo ye para todo mundo ua quelor,

mas para mi son dues:

l roixo de la quaresma cun sabor a muorte

pribaçon, i al pecado que mos torna pequerrixos

essa eideia que mos ambenena de nós mesmos;

l roixo de ls tomielhos cun oulor a bida

arrebento antre peinhas

que até l aire pon als bolcos, boubo

a rebufar andrento del mesmo.


L roixo de ls tomielhos chube las arribas

stiraça-se pula prainada

i crecé-le l delor de quetobielho als jardins:

ye l tiempo de ls tomielhos

ameroso i doce

que s’assoma i sconde ne ls piquetes

cumo se solo medrara la gana

de que nunca mais houbisse tiempo

i todo cuntinasse assi purfeito


cumo l tiempo de ls tomielhos.


Fracisco Niebro


Sem comentários: